أفضل 5 روايات سياسية
أفضل 5 روايات سياسية

أفضل 5 روايات سياسية تناسب الوضع الحالي

أفضل 5 روايات سياسية لازم تقراها عشان تفهم الاحداث السياسية اللي بتحصل دلوقت

1 – 1984

رواية 1984 تأليف جورج أورويل من أهم الروايات السياسية اللي أتكتبت في التاريخ الرواية بتحكي عن نظام سياسي قمعي و بتوصف الرقابة المشددة اللي فرضها النظام ده على الشعب لدرجة أنهم كانوا بيراقبوا الافكار

و لأن النظام ده خلى الشعب كله في حالة رعب شديدة من الاعتقال و التعذيب أو حتى القتل فبقى الجار يبلغ عن جاره و الابن يبلغ عن ابوه

و بتوضح الرواية كمان أن النظام الحاكم  ده أو الاخ الاكبر علطول بيراقبك و عارف عنك أكتر ما أنت تعرف عن نفسك و بيتدخل في كل تفصيلة ف حياتك حتى الحب و العلاقات الشخصية

لو عايز تقرا رواية 1984 أو تحملها من هنا

2 – ثلاثية غرناطة

رواية ثلاثية غرناطة تأليف رضوى عاشور (رحمها الله ) رواية عظيمة جدا وممكن تكون أفضل رواية كتبتها العظيمة رضوى عاشور الرواية بتدورأحداثها في الاندلس و بتمتد احداث الرواية عشان تحكي حكاية 3 أجيال من عائلة مسلمة واحدة و ازاي سقطت الاندلس عن طريق التنازلات المتتالية من المسلمين و أنهم قبلوا أنهم يتفرض عليهم وضع مكنش ينفع أنهم يقبلوه لدرجة أنهم بعد ما كانوا حكام الاندلس بقوا ينطردوا منها ويغيروا اسمائهم و مناسكهم عشان ميترحلوش

الدرس الاكبر اللي هتستفادوا من قراءة الرواية و هينفعك في اليومين دول أنك لازم تتمسك بقضيتك وتدافع عنها ومتتخلاش عنها أبدا مهما كانت الضغوط اللي عليك

لتحميل رواية ثلاثية غرناطة من هنا 

3 – مزرعة الحيوان

رواية مزرعة الحيوان تأليف جورج أورويل برضه وأعتبرها معظم النقاد و الادباء من أفضل 100 رواية في تاريخ الادب مع أن المؤلف لجأ للرمزية في أبطال الرواية لأن أبطال الرواية حيوانات …

الملخص و الدرس المستفاد من أحداث الرواية أن ممكن بعض الثوار بعد ما تنجح الثورة و يسيطروا على الحكم ينقلبوا على أهداف الثورة و يعملوا نظام حكم أكثر طغيانا من اللي ثاروا عليه

لتحميل الرواية من هنا 

4 – فهرنهيات 451

تأليف راي برادبري بيحكي فيها عن نظام قمعي بيحاول السيطرة على العالم عن طريق نشر الجهل بوسيلتين الوسيلة الاولانية الاعلام و البرامج التلفيزيونية و الوسيلة التانية حرق الكتب

و بيبقا مهمة حرق الكتب من نصيب رجال الاطفاء لحد ما فيه رجل إطفاء وهو
بطل الرواية بتقنعه جارته المثقفة بأنه يقرا رواية فبتعجبه جدا و بيتحول لقارئ منتظم للكتب اللي هو المفروض يحرقها و من هنا بيبدأ ثورة على النظام القمعي ده

لتحميل الرواية من هنا 

5 – باب الخروج

تأليف عز الدين شكري فشير … رواية باب الخروح صدرت سنة 2012 و دي حاجة غريبة جدا لأن معظم الاحداث اللي حصلت في مصر ف ال 3 سنين اللي فاتت موجودة في أحداث الرواية و كأن مؤلف الرواية انكشف عنه الحجاب و بيحكلنا بدقة شديدة عن الاحداث اللي هتحصل في مصر

لتحميل الرواية من هنا

 

لو زهقت من السياسة أو ملكش في السياسة خالص وعايز تقرا روايات من أنواع تانية أدخل هنا